Irix 21mm F1.4 Dragonfly

Levaba tempo querendo traerte esta review, pero entre unhas cousas e outras non puiden dedicarlle o tempo que me gustaría, así que se atrasou un pouco máis do previsto.

O equipo de Irix Lens envioume esta lente vai xa moito tempo e, desde entón, estiven probándoa en diversas situacións. Decidín agardar ata agora para publicar a review e así poder ofrecer unha análise máis pormenorizada de xeito que puidese asegurarme de poñer a proba esta lente en todas as circunstancias posibles. Sobre todo, quería poñela a proba nunha disciplina na que aínda son un pouco “novato” pero na que pouco a pouco vou facendo as miñas incursións: a fotografía nocturna.

Cunha distancia focal fixa de 21mm e unha apertura máxima de F1.4, esta lente preséntase como unha opción máis que interesante para fotografía de paisaxe, arquitectura e, por suposto, nocturna. De feito, é nesta última disciplina onde esta lente se postula como unha opción realmente boa.

O meu principal obxectivo con esta review é poder proporcionar información o máis veraz posible e baseada na miña propia experiencia coa lente, cos seus puntos fortes e cos seus detalles non tan bos. Espero poder axudarche a comprender se esta lente é a axeitada para ti e para os teus proxectos fotográficos.

Sen máis preámbulos, invítote a acompañarme neste percorrido polo Irix 21mm F1.4 Dragonfly e descubrir que tal traballa. Comecemos!

Primeiras Impresións

Unha vez máis teño que recoñecer que me encantou a presentación da lente. Xa o comentara na review do IRIX 150MM F2.8 DRAGONFLY e a marca volveuno conseguir outra vez máis.

A lente vén presentada nunha caixa completamente negra, onde as inscricións e a información destacan en azul e branco, as cores características de Irix. Ao abrila, atopámonos coa icónica libeliña que identifica os modelos Dragonfly e cunha funda de neopreno ríxida que contén o obxectivo no seu interior.

Primeira vez nas miñas mans e primeiras sensacións. Unha soa palabra podería resumilo: Robustez.

Cando suxeitas por primeira vez o obxectivo notas esta robustez que vos comento, a solidez, a calidade dos seus materiais, dos seus acabados tal e como vén sendo habitual nos obxectivos Irix. O Irix 21mm F1.4 Dragonfly enmárcase dentro do estándar de fabricación Dragonfly (como xa nos indica a súa caixa nada máis abrila), que se destaca por unha estrutura interna reforzada con elementos metálicos, acabado resistente aos arañazos, anel de enfoque antideslizante e marcas gravadas con pintura reactiva á luz UV. A súa construción está baseada nunha aliaxe de magnesio, un estándar adoptado pola marca, e ademais, está selada en puntos clave, o que lle confire resistencia aos elementos en condicións climáticas adversas.

Especificacións Técnicas

O obxectivo Irix 21mm F1.4 Dragonfly ofrece unha serie de características que o converten nunha opción atractiva para os amantes da fotografía de gran angular. Non profundarei demasiado neste aspecto xa que esta información está dispoñible na propia web de Irix Lens.
A continuación, comento algúns puntos de interese:

Detalles

• Lente luminosa: O Irix 21mm conta cunha apertura máxima de F1.4, o que o converte nunha excelente opción para fotografar en condicións de pouca luz e para lograr un atractivo efecto de desenfoque (bokeh).
• Distancia focal gran angular: Cunha distancia focal fixa de 21mm, este obxectivo ofrece un amplo campo de visión de 89,7°.
• Calidade óptica: A súa construción óptica baséase en 4 elementos de vidro de dispersión ultra baixa, 4 elementos altamente reflectantes e 2 elementos asféricos, cun total de 15 elementos en 11 bloques ópticos. Esta configuración busca minimizar a distorsión, que se mantén por baixo do 2%. Isto veremos máis adiante!
• Diafragma de 11 láminas.
• Sellado: O obxectivo está equipado con selos especiais que protexen contra a humidade e a suciedade, o que o fai adecuado para traballar en condicións climáticas adversas con garantías.
• Control de apertura: O obxectivo permite o control da apertura directamente desde a cámara.
• Confirmación de enfoque na cámara: Proporciona un sistema de confirmación de enfoque xa sexa a través do visor e/ou un aviso sonoro.
• Anel de enfoque: Presenta un anel de enfoque único, cunha textura característica e material de goma de alta calidade que facilita o enfoque manual e a sensibilidade á posición do anel. Tamén inclúe a función “Focus Lock” que permite bloquear a posición do anel para evitar “accidentes” durante tomas para apilados e noutras circunstancias especialmente delicadas.
• Comunicación: Permite o rexistro completo dos datos EXIF e a súa transferencia á cámara para facilitar o traballo na postprodución.

Experiencia no campo

É o momento de pasar da teoría á práctica, ao que considero realmente importante nunha review e no que investirei máis tempo.

¡Vexamos o que deu de si a miña experiencia co Irix 21mm F1.4 Dragonfly!

Angular e á vez non tan angular

Unha das cousas que supuxo un reto e á vez unha vantaxe foi que, a pesar de que un 21mm segue sendo unha lente angular, non chega ao ángulo de visión ao que estou acostumado.

Explícome!

Estou moi afeito a usar o meu Irix 15mm Blackstone na maior parte das miñas fotografías, estou namorado desa focal, e por costume (ou preguiza, haha) adoita estar colocado na miña cámara sempre. Pasar dos 110º de campo de visión do 15mm aos 89,7º do 21mm cambia o paradigma e obrígache a replantexar o teu esquema mental á hora de compoñer unha fotografía. Efectivamente, isto é un reto ao principio e o que fixo que me custara comezar co 21mm, pero que se foi convertindo nunha vantaxe e me abriu un abano de novas posibilidades compositivas.

Aquí déixovos unha pequena comparativa de perspectivas para que vexades a diferenza entre 3 das lentes Irix:

Distorsión Xeométrica: Pequena Distorsión de Barril

Un dos detalles nos que reparei ao procesar as fotografías é que a lente ten unha leve distorsión de barril. Esta distorsión fíxose evidente ao observar detidamente unha das tomas, onde o horizonte mostraba unha lixeira curvatura no centro, elevando sutilmente a liña do horizonte.

Para que sexa máis sinxelo de ver, incluín unha liña vermella sobre o horizonte e unha capa de curvas para contrastar a imaxe de mostra. Isto permite visualizar a distorsión de maneira máis clara.

Pódese comprobar que nos laterais, o horizonte está inclinado cara abaixo e no centro hai unha maior distancia coa liña vermella.

É importante mencionar que a lente Irix 21mm non conta con perfís de lente dispoñibles para Capture One (descoñezo se existen para outro software), o software que adoito utilizar para comezar os meus procesados. Isto implica que a corrección da distorsión da lente debe realizarse de forma manual. Afortunadamente, corregir esta distorsión non resulta complicado e pódese lograr cun pouco de coidado durante o proceso de edición.

Lembra que esta distorsión, aínda que presente, é bastante leve e podería non ser un problema para moitos fotógrafos, especialmente se están dispostos a realizar estas correccións na postprodución.

Viñeteo: Ausencia de Efecto Notable

O viñeteo, que se manifesta como unha diminución gradual da luminosidade cara ás esquinas da imaxe, adoita ser unha preocupación nas lentes gran angular. Non obstante, no caso desta lente, a ausencia dun viñeteo notable contribúe a manter unha iluminación uniforme en todo o encadre, o que é especialmente beneficioso ao traballar en condicións de pouca luz ou en situacións de alto contraste.

Marcas Hiperfocal

Un dos detalles que echo en falta respecto a outras lentes Irix son as marcas de hiperfocal que facilitan moito o enfoque nunha lente manual.

Non é nada que non se poida solucionar facendo os cálculos correspondentes ou empregando aplicacións como Photopills.

Nitidez en todas condiciones

Cando non temos moita luz

O obxectivo Irix 21mm F1.4 Dragonfly consegue resultados máis que aceptables en condicións de pouca luz. Capturéi fotografías nocturnas a F11 cunha exposición de 30 segundos e un ISO de 1600. Neste tipo de tomas, quería poñer a proba a capacidade da lente para ofrecer nitidez en situacións onde a iluminación é escasa, e superou a proba.

E todo mellora con máis luz

Ademáis do seu rendemento en condicións de pouca luz, a lente Irix 21mm F1.4 Dragonfly demostra unha capacidade excepcional para capturar detalles nítidos e claros en paisaxes diurnos. A continuación, amósanse recortes ao 100% de algunhas fotografías de paisaxes diurnos, tomadas en diversas localizacións e condicións de luz.

Estes recortes revelan a calidade óptica da lente, ofrecendo unha moi boa nitidez incluso nos detalles máis finos. Ademais, a reprodución do cor e o contraste tamén se manteñen a un alto nivel.

Creando Estrelas: Sunstars

Unha das agradables sorpresas que descubrín ao explorar as capacidades desta lente foi a súa capacidade para crear estrelas de sol ao pechar simplemente o diafragma a F8. Estes detalles engaden un toque especial ás fotografías, un extra que me gusta incluír en certas situacións. Isto achega unha dimensión adicional de versatilidade, permitíndonos xogar coa luz dunha maneira máis creativa. Ademáis, poder crear unha sunstar cunha apertura como esa axúdache a evitar grandes problemas de difracción.

Distorsión nas esquinas a F1.4: Unha observación a ter en conta

Ao realizar probas exhaustivas coa lente Irix 21mm F1.4 Dragonfly en condicións de fotografía nocturna á súa máxima apertura de F1.4, observei unha pequena distorsión nas esquinas da imaxe. Este fenómeno faise evidente ao capturar detalles en ceos nocturnos, onde as estrelas nas esquinas tendían a perder definición e adoptar unha forma similar a comas.

É importante destacar que esta distorsión é máis pronunciada ao disparar a F1.4, e o seu impacto pode variar segundo a composición e as condicións específicas da toma. Para algúns fotógrafos, este efecto podería ser aceptable. Con todo, é esencial ter en conta esta observación ao planificar a captura de imaxes en ambientes nocturnos a aperturas máximas. A min, persoalmente, non é algo que me quite o sono ou que supoña un gran problema.

Para mitigar este efecto, algúns usuarios poden optar por pechar lixeiramente o diafragma ou explorar técnicas de postproducción para corregir digitalmente esta distorsión nas etapas de edición.

Limitación no emprego de filtros de rosca

Ata fai pouco, un dos aspectos que debíamos ter en conta ao considerar a lente Irix 21mm F1.4 Dragonfly era a imposibilidade de usar filtros debido á carencia de rosca interna. Entendo que isto se deriva do seu deseño específico orientado á fotografía nocturna e astrofotografía. Con todo, Irix Lens abordou este problema e proporcionou unha posible solución para aqueles de nós que empregamos habitualmente filtros polarizadores.

Recentemente, a marca envioume un novo accesorio deseñado para esta lente: un adaptador que se coloca na rosca do parasol e permite a fixación de filtros de rosca de 105mm. Este adaptador resolve o problema inicial e aporta a flexibilidade de usar filtros circulares.

Con este adaptador, Irix Lens demostra o seu compromiso coa mellora continua e a atención ás necesidades dos fotógrafos, xa que algúns de nós comentamos este problema con eles e finalmente proporcionáronnos unha solución.

Bota unha ollada aquí: Irix Edge Filter Adapter for 21mm lens + Lens Cap

O único punto de mellora que engadiría é que esperaba que o adaptador fose algo máis robusto. Descoñezo se se trata dun prototipo en fase de desenvolvemento ou se é a versión definitiva. Sexa como sexa, é totalmente utilizable e cumpre a súa función.

Conclusión: As miñas impresións.

O Irix 21mm F1.4 Dragonfly podería ser unha opción interesante para determinadas disciplinas fotográficas. Con os seus claros e escuros, esta lente demostra ser unha opción valiosa para fotografía nocturna e astrofotografía grazas a esa apertura máxima de F1.4.

A pesar da pequena distorsión de barril, non considero que sexa un impedimento para que teña un moi bo rendemento en fotografía de paisaxe tanto diurna como nocturna. É esencial ter presente isto, xa que no peor dos casos requirirá axustes durante o procesado. A carencia de perfís de lente para certos programas tamén implica que estas correccións deben facerse de forma manual. Na miña opinión, isto non é nada preocupante.

O Irix 21mm F1.4 Dragonfly resáltase como unha elección robusta, especialmente deseñada para fotógrafos enfocados na captura de momentos nocturnos e astrofotografía.

A elección desta lente dependerá en última instancia das necesidades e preferencias individuais.

E como mostra un botón, aquí vos deixo algunhas fotografías que tomei con esta lente.

Fotografía de Paisaxe Nocturno

Tiña moitas gañas de probar o Irix 21mm F1.4 Dragonfly neste lugar. Así que decidín capturar o arco completo da vía láctea sobre o faro de Punta Nariga en Cabana de Bergantiños (A Coruña). Ademais, busquei unha nova perspectiva que me permitira ter un primeiro plano interesante e así completar a composición.

Ademáis, este verán puiden achegarme a algunhas localizacións para seguir mellorando as miñas aptitudes coa fotografía nocturna. Aquí vos deixo outra foto que tomei no Concello de Muras en Lugo.

Fotografía de Paisaxe Diurno

Aquí algunhas mostras de campo de fotografías tomadas co Irix 21mm F1.4 Dragonfly.